ಬೆಂಗಳೂರು.
ಸ್ಟಾಕ್ ಸ್ಟಾಕ್ ಇನ್ವೆಸ್ಟ್ಮೆಂಟ್ ಹೆಸರಿನಲ್ಲಿ ಹಣ ಹೂಡಿಕೆ ಮಾಡಿಸಿಕೊಂಡು ವಂಚನೆ ಮಾಡುತ್ತಿದ್ದ ಬೆಂಗಳೂರಿನ ಹತ್ತು ಜನರನ್ನು ಉತ್ತರ ವಿಭಾಗದ ಸೆನ್ ಠಾಣೆ ಪೊಲೀಸರು ಬಂಧಿಸಿದ್ದಾರೆ.
ಶ್ರೀನಿವಾಸರೆಡ್ಡಿ(43), ಆಕಾಶ್(27), ಪ್ರಕಾಶ್(43), ಸುನೀಲ್ ಕುಮಾರ್(45), ಸಾಯಿಪ್ರಜ್ವಲ್(38), ರವಿಶಂಕರ್(24), ಮಧುಸೂದನ್ ರೆಡ್ಡಿ(41), ಸುರೇಶ್(43), ಕಿಶೋರ್ ಕುಮಾರ್(29) ಮತ್ತು ಒಬುಲ್ ರೆಡ್ಡಿ(29)ಬಂಧಿತರು.
ಇವರು ಫೇಸ್‌ಬುಕ್ ಮೂಲಕ ಜಾಹೀರಾತು ನೀಡುತ್ತಿದ್ದರು. ಬಳಿಕ ವಾಟ್ಸ್ಅಫ್, ಟೆಲಿಗ್ರಾಂ ಮೂಲಕ ಗ್ರೂಪ್‌ಗೆ ಜಾಯಿನ್ ಆಗುವಂತೆ ಮಾಡುತ್ತಿದ್ದರು. ಅಲ್ಲದೇ ಆಪ್‌ನಲ್ಲಿ ಹೂಡಿಕೆ ಹಣ ಹೆಚ್ಚಾಗಿ ತೋರಿಸುತ್ತಿತ್ತು. ಆದರೆ ಅಷ್ಟು ಹಣ ತೆಗೆಯಲು ಹೋದಾಗ ಮೋಸದ ಜಾಲ ಅರಿವಾಗಿದೆ. ಇದೇ ರೀತಿ ಟೆಕ್ಕಿಯೊಬ್ಬರು ಮೋಸ ಹೋಗಿದ್ದರು.
88 ಲಕ್ಷ ರೂ.ವಂಚನೆ.
ಈ ಆರೋಪಿಗಳು ಸಾಫ್ಟವೇರ್ ಎಂಜಿನಿಯರ್‌ರೊಬ್ಬರಿಗೆ 88 ಲಕ್ಷ ರೂ.ವಂಚಿಸಿದ್ದಾರೆ. ಈ ದೂರಿನ್ವಯ ಪೊಲೀಸರು ತಂಡ ರಚನೆ ಮಾಡಿಕೊಂಡು ಹತ್ತು ಜನರನ್ನು ಬಂಧಿಸಿದ್ದಾರೆ. ಪ್ರಮುಖ ಆರೋಪಿಗಳು ದುಬೈನಲ್ಲಿದ್ದಾರೆ. ಬಂಧಿತರಿAದ 51 ಮೊಬೈಲ್‌ಗಳು, 27 ಡೆಬಿಟ್ ಕಾರ್ಡ್ಗಳು, 108 ಪಾಸ್ ಬುಕ್ ಮತ್ತು ಚೆಕ್‌ಗಳು, 480 ಸಿಮ್ ಕಾರ್ಡ್ಗಳು, 2 ಲ್ಯಾಪ್‌ಟಾಪ್‌ಗಳು, 2 ಸಿಪಿಯು, 48 ಅಕೌಂಟ್ ಕ್ಯೂಆರ್ ಕೋಡ್, 42 ರಬ್ಬರ್ ಸ್ಟಾಂಪ್‌ಗಳು, 103 ಉದ್ಯಮ್ ಮತ್ತು ಜಿಎಸ್‌ಟಿ ದಾಖಲೆಗಳು, 230 ಕರೆಂಟ್ ಅಕೌಂಟ್ ದಾಖಲೆಗಳನ್ನು ವಶಕ್ಕೆ ಪಡೆಯಲಾಗಿದೆ ಎಂದು ನಗರ ಪೊಲೀಸ್ ಆಯುಕ್ತ ಬಿ.ದಯಾನಂದ ಮಾಹಿತಿ ನೀಡಿದರು.
ಲಿಂಕ್ ಮೂಲಕ ಸ್ಟಾಕ್ ಮಾರ್ಕೆಟಿಂಗ್.
ದೂರುದಾರ ಟೆಕ್ಕಿ ಕೆಲ ದಿನಗಳ ಹಿಂದೆ ಫೇಸ್‌ಬುಕ್‌ಪೇಜ್‌ವೊಂದರಲ್ಲಿ ಬಂದ ಸ್ಟಾಕ್ ಮಾರ್ಕೆಟಿಂಗ್ ಇನ್ವೆಸ್ಟ್ಮೆಂಟ್ ಜಾಹೀರಾತಿನ ಲಿಂಕ್ ಮೂಲಕ ಬ್ರಾಂಡ್‌ವೈನ್ ಗ್ರೂಪ್ ಮತ್ತು ಬ್ರಾಂಡ್ ಸ್ಪೀಡ್‌ಗ್ರೂಪ್ ಮಾರ್ಕೆಟಿಂಗ್‌ಗಳನ್ನು ಡೌನ್‌ಲೋಡ್ ಮಾಡಿಕೊಂಡಿದ್ದಾರೆ. ಬಳಿಕ ವಾಟ್ಸಅಪ್ ಗ್ರೂಪ್‌ಗೆ ಸೇರಿಕೊಂಡಿದ್ದಾರೆ. ನಂತರ ಆಪ್ ಡೌನ್‌ಲೋಡ್ ಮಾಡಿಕೊಂಡರೇ ಹೆಚ್ಚು ಆದಾಯ ಬರಲಿದೆ ಎಂದು ನಂಬಿ ಅ.10ರಿಂದ ನ.9ರವರೆಗೆ ವಿವಿಧ ಹಂತದಲ್ಲಿ 88.83 ಲಕ್ಷ ರೂನ್ನು ವಿವಿಧ ಬ್ಯಾಂಕ್ ಖಾತೆಗಗಳಿಗೆ ವರ್ಗಾಯಿಸಿಕೊಂಡಿದ್ದಾರೆ. ಆ ಬಳಿಕ ತಾವೂ ವಂಚನೆಗೊಳಗಾಗಿರುವುದು ಗೊತ್ತಾಗಿ ದೂರು ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಬ್ಯಾಂಕ್ ಖಾತೆದಾರ ಮಾಹಿತಿ ಸಂಗ್ರಹಿಸಿ ಬಂಧಿಸಲಾಗಿದೆ ಎಂದು ಆಯುಕ್ತ ದಯಾನಂದ್ ತಿಳಿಸಿದ್ದಾರೆ.
ದುಬೈಯಿಂದ ವಂಚನೆ.
ಆರೋಪಿಗಳ ಪೈಕಿ ರವಿಶಂಕರ್ ಈ ಹಿಂದೆ ದುಬೈನಲ್ಲಿ ಕೆಲಸ ಮಾಡುತ್ತಿದ್ದು, ಈ ವೇಳೆ ಕೆಲವು ಸೈಬರ್ ವಂಚಕರ ಪರಿಚಯವಾಗಿದೆ. ಬಳಿಕ ಬೆಂಗಳೂರಿಗೆ ಬಂದು ಇತರೆ ಆರೋಪಿಗಳ ಜತೆ ಸೇರಿಕೊಂಡು ಅಮಾಯಕ ವ್ಯಕ್ತಿಗಳಿಗೆ ಕಮಿಷನ್ ಆಮಿಷವೊಡ್ಡಿ ಅವರ ಆಧಾರ್ ಕಾರ್ಡ್,ಪಾನ್ ಕಾರ್ಡ್ಗಳನ್ನು ಪಡೆದು ಬ್ಯಾಂಕ್ ಖಾತೆಗಳನ್ನು ತೆರೆದಿದ್ದರು. ಈ ಖಾತೆಗಳ ವಿವರಗಳನ್ನು ದುಬೈನಲ್ಲಿರುವ ವಂಚಕರಿಗೆ ಮಾರಾಟ ಮಾಡುತ್ತಿದ್ದರು. ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ಇನ್ವೆಸ್ಟ್ಮೆಂಟ್ ಲಿಂಕ್ ಕಳುಹಿಸುತ್ತಿದ್ದರು. ಬಳಿಕ ಆ ಲಿಂಕ್ ಕ್ಲೀಕ್ ಮಾಡಿದ ವ್ಯಕ್ತಿಗಳಿಗೆ ಹೂಡಿಕೆ ಹಣ ಡಬಲ್ ಆಗುತ್ತದೆ ಎಂದು ನಂಬಿಸಿ ಹಣ ಹಾಕಿಸಿಕೊಂಡು ವಂಚಿಸುತ್ತಿದ್ದರು. ಅದಕ್ಕಾಗಿ ಬಂಧಿತರು ತ್ಯಾಜಗರಾಜನಗರ ಮತ್ತು ಸದಾಶಿವನಗರದಲ್ಲಿ ಎರಡು ಪ್ರತ್ಯೇಕ ಕಚೇರಿಗಳನ್ನು ತೆರೆದಿದ್ದರು. ನಿರ್ದಿಷ್ಟ ಬ್ಯಾಂಕ್ ಖಾತೆಗೆ ಹಣ ವರ್ಗಾವಣೆ ಆಗುತ್ತಿದ್ದಂತೆ ದುಬೈನಲ್ಲಿರುವ ವ್ಯಕ್ತಿ ಖಾತೆಗೆ ವರ್ಗಾವಣೆ ಮಾಡಿಸಿಕೊಳ್ಳುತ್ತಿದ್ದ ಎಂದು ಕಮಿಷನರ್ ತಿಳಿಸಿದರು.
1 ಕೋಟಿಗೆ 1ಲಕ್ಷ ರೂ. ರೂ. ಕಮಿಷನ್.
ಬಂಧಿತ ಆರೋಪಿಗಳಿಗೆ ದುಬೈನಲ್ಲಿರುವ ವಂಚಕರು ಒಂದು ಕೋಟಿ ರೂ. ವರ್ಗಾವಣೆಯಾದರೆ 1 ಲಕ್ಷ ರೂ. ಕಮಿಷನ್ ನೀಡುತ್ತಿದ್ದರು. ಹೀಗೆ ಸುಮಾರು 2-3 ವರ್ಷಗಳಿಂದ ವಂಚನೆ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ ಎಂದು ಪೊಲೀಸ್ ಆಯುಕ್ತರು ಹೇಳಿದರು.
1467 ಎನ್‌ಸಿಆರ್‌ಪಿ ದೂರುಗಳು ಪತ್ತೆ.
ವಂಚನೆ ಕೃತ್ಯಕ್ಕೆ ಆರೋಪಿಗಳು ಬಳಸುತ್ತಿದ್ದ ಬ್ಯಾಂಕ್ ಖಾತೆಗಳ ವಿರುದ್ಧ ಭಾರತದಾದ್ಯಂತ 1467 ಎನ್‌ಸಿಆರ್‌ಪಿ ದೂರುಗಳು ದಾಖಲಾಗಿವೆ ಎಂಬುದು ಗೊತ್ತಾಗಿದೆ. ಈ ಪೈಕಿ ಉತ್ತರ ವಿಭಾಗದ ಸೆನ್ ಠಾಣೆಯ 15 ಎನ್‌ಸಿಪಿಆರ್ ಪ್ರಕರಣಗಳು ಪತ್ತೆಯಾಗಿವೆ ಎಂದು ಪೊಲೀಸ್ ಆಯುಕ್ತ ಬಿ.ದಯಾನಂದ ಮಾಹಿತಿ ನೀಡಿದರು.
ಸುದ್ದಿಗೋಷ್ಠಿಯಲ್ಲಿ ಹೆಚ್ಚುವರಿ ಪೊಲೀಸ್ ಆಯುಕ್ತರಾದ ಸತೀಶ್ ಕುಮಾರ್, ಸಿಸಿಬಿ ಮುಖ್ಯಸ್ಥ ಚಂದ್ರಗುಪ್ತ, ಡಿಸಿಪಿ ಸೈದುಲ್ಲಾಅಡಾವತ್, ಎಸಿಪಿ ಎನ್.ಪವನ್, ಪಿಎಸ್‌ಐ ರಾಜು ಹಾಗೂ ಇತರೆ ಸಿಬ್ಬಂದಿ ಇದ್ದರು
