ಬಸವಾಪಟ್ಟಣ:
ಸಮೀಪದ ಮರಬನಹಳ್ಳಿಯ ಜನವಸತಿ ಪ್ರದೇಶದಲ್ಲಿ ಕರಡಿಯೊಂದು ಕಾಣಿಸಿಕೊಳ್ಳುತ್ತಿದ್ದು, ಗ್ರಾಮಸ್ಥರಲ್ಲಿ ಆತಂಕ ಸೃಷ್ಟಿಸಿದೆ.
‘ಮರಬನಹಳ್ಳಿ ಕುರುಬರಹಳ್ಳಿ ರಸ್ತೆಯಲ್ಲಿ ನಮ್ಮದು ಒಂಟಿ ಮನೆ ಇದ್ದು, ಹಲವು ದಿನಗಳಿಂದ ಮನೆಯ ಮುಂದೆ ಕರಡಿ ಓಡಾಡುತ್ತಿದೆ. ಭಾನುವಾರ ರಾತ್ರಿ ಕರಡಿ ಓಡಾಡಿರುವ ದೃಶ್ಯ ಮನೆಯ ಸಿ.ಸಿ ಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಅರಣ್ಯ ಇಲಾಖೆ ಸಿಬ್ಬಂದಿ ಕೂಡಲೇ ಇಲ್ಲಿ ಬೋನು ಅಳವಡಿಸಿ ಕರಡಿಯನ್ನು ಸೆರೆ ಹಿಡಿಯಬೇಕು’ ಎಂದು ಗ್ರಾಮದ ನಿವಾಸಿ ಪಂಚಾಕ್ಷರಯ್ಯ ಒತ್ತಾಯಿಸಿದ್ದಾರೆ.
‘ಗ್ರಾಮದಲ್ಲಿ ನಾಲ್ಕೈದು ದಿನಗಳಿಂದ ಕರಡಿ ಸಂಚರಿಸುತ್ತಿದ್ದು, ಇಲ್ಲಿನ ಗದ್ದೆ ತೋಟಗಳಿಗೆ ಹೋಗುವ ರೈತರು ಹಾಗೂ ಹತ್ತಿರದ ಕುರುಬರಹಳ್ಳಿ ಮತ್ತು ರೆಡ್ಡಿಹಳ್ಳಿಯ ಜನ ಭಯಗೊಂಡಿದ್ದಾರೆ’ ಎಂದು ಗ್ರಾಮ ಪಂಚಾಯಿತಿ ಮಾಜಿ ಸದಸ್ಯ ಜಿ.ಎಂ.ಚನ್ನಬಸಪ್ಪ ಹೇಳಿದರು.
‘ಮರಬನಹಳ್ಳಿಯಲ್ಲಿ ಕರಡಿ ಕಾಣಿಸಿಕೊಂಡಿರುವ ಗೊತ್ತಾಗಿದೆ. ಗ್ರಾಮಸ್ಥರಿಂದ ಮಾಹಿತಿ ಪಡೆದು ಬೋನು ಅಳವಡಿಸಿ ಕರಡಿಯನ್ನು ಸೆರೆ ಹಿಡಿಯಲು ಕ್ರಮ ಕೈಗೊಳ್ಳಲಾಗುವುದು’ ಎಂದು ಮಾವಿನಕಟ್ಟೆ ವಲಯದ ಅರಣ್ಯಾಧಿಕಾರಿ ಮನೋಹರ್‌ ತಿಳಿಸಿದ್ದಾರೆ
