ದಾವಣಗೆರೆ: ಪಡಿತರ ರಾಗಿಯನ್ನು ಅಕ್ರಮವಾಗಿ ಸಂಗ್ರಹಿಸಿದ್ದ ಓರ್ವ ಆರೋಪಿಯನ್ನು ಬಂಧಿಸಿರುವ ಪೊಲೀಸರು, ಬಂಧಿತನಿಂದ 18,400 ರೂ., ಮೌಲ್ಯದ 920 ಕೆಜಿ ರಾಗಿಯನ್ನು ವಶಕ್ಕೆ ಪಡೆದಿದ್ದಾರೆ.
ಹರಿಹರ ನಗರದ ಸ್ಟಾರ್ ಟ್ರೇರ‍್ಸ್ ಮಾಲಿಕ ಸಯ್ಯದ್ ತಾಜುದ್ದೀನ್ ಬಂಧಿತ ಆರೋಪಿ.
ಹರಿಹರ ನಗರದ ಮನೆಯೊಂದನ್ನು ಬಾಡಿಗೆ ಪಡೆದುಕೊಂಡು ಆ ಮನೆಯಲ್ಲಿ ಸಾರ್ವಜನಿಕ ವಿತರಣೆ ಪದ್ದತಿಯಲ್ಲಿ ವಿತರಣೆ ಮಾಡುವ ರಾಗಿಯನ್ನು ಕಾಳಸಂತೆಯಲ್ಲಿ ಮಾರಾಟ ಮಾಡುವ ಉದ್ದೇಶದಿಂದ ಅಕ್ರಮವಾಗಿ ಸಂಗ್ರಹಣೆ ಮಾಡಿದ್ದಾಗಿ ಖಚಿತ ಮಾಹಿತಿ ಬಂದ ಮೇರೆಗೆ ಹರಿಹರ ನಗರ ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿಗಳ ತಂಡ ಹಾಗೂ ಆಹಾರ ನಿರೀಕ್ಷ ಎಂ. ನಜರುಲ್ಲಾ ಅವರೊಂದಿಗೆ ದಾಳಿ ನಡೆಸಿ ಆರೋಪಿಯನ್ನು ಬಂಧಿಸಿದೆ.
ಇದು ಅಕ್ರಮ ದಾಸ್ತಾನು ಎಂದು ಪರಿಗಣಿಸಿ ಆರೋಪಿ ಸಯ್ಯದ್ ತಾಜುದ್ದೀನ್ ವಿರುದ್ಧ ಆಹಾರ ನಿರೀಕ್ಷಕರು ನೀಡಿದ ದೂರಿನ ಮೇರೆಗೆ ಹರಿಹರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
